Жоомарт Оторбаев: "Салык кызматында кол тийбестик деген болбойт, салык чогултуу планын аткарбагандар жооп бериши керек"

Премьер-министр Жоомарт Оторбаев 17-июлда 2014-жылдын январь-июнь айларындагы бюджеттин киреше бөлүгү боюнча кеңешме өткөрдү. Ага биринчи вице-премьер-министр Тайырбек Сарпашев, Мамлекеттик салык кызматынын төрагасы Замирбек Осмонов жана экономика министринин орун басары Адылбек Касымалиев катышты. Оторбаев Мамлекеттик салык кызматы ири соода түйүндөрүнө салык төлөмдөрүн кабыл алуучу терминалдарды орнотконун, муну өлкө боюнча жайылтуу керектигин айтты.

"Белгилеп кетким келет, 2015-жылдын 1-январынан тарта Мамлекеттик салык кызматынын аймактар аралык бөлүмдөрүн жоюу боюнча өкмөттүн чечими бирин-бири кайталаган органдарды жоготуп, ишкерлердин ишин жеңилдетет",- деди премьер.

Салык төлөмдөрү өз убагында чогултулушу керектигин айткан өкмөт жетекчиси "Мамлекеттик салык кызматында кол тийбестик болбойт, кимде-ким салык топтоодогу планды аткарбаса, алардын баары жекече жоопкерчилик тартышы керек" деп кошумчалады.

Автор: Автандил Добулбеков