Нарын. Кыргызстандын 2015-2017-жылдарга бюджетинин долбоору боюнча коомдук угуулар өтүүдө

Кыргыз Республикасынын Каржы министрлиги Нарын шаарында Кыргыз Республикасынын 2015-жылга республикалык бюджетинин долбоору жана 2016-2017-жылдарга болжолу боюнча коомдук угууларды өткөрүүдө. Бул тууралуу 23-июлда аталган министрликтин басма сөз кызматы билдирди.

Коомдук угуулардын негизги максаттары - мамлекеттик каржыны башкаруунун натыйжалуулугун жогорулатуу, анын ичинде бюджеттин ачыктыгын камсыздоо, бюджеттик процесстерге жарандардын кызыгуусун арттыруу, активдүү катышуусун камсыз кылуу.

Иш-чарага Каржы министрлигинин, жарандык коомдун, жалпыга маалымдоо каражаттарынын өкүлдөрү, Нарын облусуна караштуу район, айыл жетекчилери, финансы кызматкерлери, облус жана шаар жетекчилери жана башкалар катышууда.

Программага ылайык, министрликтин адистери угуунун катышуучуларына келерки жылдарга бюджетти түзүү, анын болжолдуу көрсөткүчтөрү, багыттары жана өзгөчөлүктөрү жөнүндө айтып беришти. Адистер белгилегендей, 2015-2017-жылдардын орточо мөөнөттүү мезгилинде экономикалык саясаттын башкы максаты макроэкономикалык туруктуулукту бекемдөөгө жана экономикалык өсүштү камсыз кылууга багытталат. 2015-жылга ички дүң продукциянын реалдуу темпинин өсүшү 6 пайыз деңгээлинде болжолдонууда. Социалдык саясат жаатындагы негизги милдеттер болуп калктын жумуштуулугун жогорулатуу жана эмгек ресурстарынын атаандаштыкка жөндөмдүүлүгү, турмуш деңгээли жана сапаты, жумушсуздук деңгээлин азайтуу болмокчу. Экономиканын болжолдуу өсүүсүн эске алганда, бюджеттин кирешелери 2015-жылы 117,3 миллиард сомдон 2017-жылга 143,0 миллиард сомго өсөт.

Автор: Айпери Ганыжан кызы