Премьер-министр Жоомарт Оторбаев Швейцариянын президенти Дидье Буркхальтер менен жолугушту

Бүгүн, 22-ноябрда Бишкекте премьер-министр Жоомарт Оторбаев Швейцариянын президенти Дидье Буркхальтер менен жолугушту. Жолугушуунун башында Жоомарт Оторбаев Швейцария менен кызматташууга кызыкдар экенин айтты. Бул тууралуу өкмөттүк аппараттан билдиришти.

Маалыматка ылайык, өкмөт башчы Швейцариянын парламенттик демократия курууда тажрыйба алмашуу боюнча, 2015-жылы парламенттик шайлоо, 2017-жылы президенттик шайлоо болору тууралуу айтып, толук парламентаризм жана бийликти борбордон ажыратуу (децентрализация) пландары тууралуу маалымат берди.

Өз кезегинде Дидье Буркхальтер Швейцария шайлоону өткөрүүдө жана башка кырдаалдарда көмөк көрсөтүүгө даяр экенин билдирди. Жолугушуунун жүрүшүндө Швейцариянын жана Европадагы коопсуздук жана кызматташтык боюнча уюмдун колдоосу астында бир катар долбоорлор ишке ашырылары тууралуу сөз болду. Анда экологиялык тең салмактуулукту, саламаттыкты сактоо жана айыл жергесиндеги калкты таза суу менен камсыздоо боюнча бир катар иштер аткарылат.

Автор: Максат Кудайбердиев