Оштогу төрөт үйүнө жасалма дем алдыруучу аппараттарды сатып алуу маселеси каралууда

Ош шаардык төрөт үйүнө балдарга жасалма дем алдыруучу аппаратты сатып алуу үчүн 2015-жылы жергиликтүү бюджеттен 5 миллион сом акча каражатын бөлүп берүүнү Ош шаарынын вице-мэри Иличбек Эргешов шаардык кеңештин кезектеги отурумунда сунуштоодо.

Анын айтымында, үстүбүздөгү жылдын мартында шаардык кеңеш токтом чыгарган. Анда 2014-жылдын алты айынын жыйынтыгы боюнча жергиликтүү бюджеттен кошумча акча каражаты ашып кала турган болсо, ал каражатка шаардык төрөт үйүнө медициналык аппараттарды сатып алуу айтылган.

“Шаардык кеңештин токтому 27-март күнү чыккан. Бирок Билим берүү жана илим министрлиги менен Каржы министрлигинен "1-4-класстагы окуучулардын мектептеги тамак-ашы жергиликтүү бюджеттен каржылансын" деген буйрук келди. Ошондуктан бизде акча маселеси жаралып, кыска убактын ичинде 19 миллион сомду мектеп тамак-ашына таап берүү керек болуп калган. Анын натыйжасында биз алты айдын жыйынтыгы менен 5 миллион сом бөлүп бере албай калдык. Ошондуктан ымыркайлардын жана энелердин өмүрү биз үчүн өтө баалуу экендигин эске алып, 2015-жылдын 1-кварталында ымыркайларды жасалма дем алдыруучу аппараттарды сатып алуу үчүн жергиликтүү бюджеттен акча карап берүүнү сунуштап жатабыз”,- деди И.Эргешов.

Вице-мэр шаардык төрөт үйүнө 12 аппарат керек болгон болсо, бүгүнкү күндө эки гана аппарат иштеп жатканын кошумчалады.

Автор: Айпери Ганыжан кызы