Кубанычбек Турдубаев: "Эл үчүн 70 тыйындык тарифти өзгөртпөй коюуга болорун же болбой турганын айта албайм"

Электр энергиясынын тарифтерин азыркыдай 70 тыйындык чекте калтырууга (700 киловатт үчүн) мүмкүн же мүмкүн эместиги азырынча белгисиз. Муну энергетика жана өнөр жай министри Кубанычбек Турдубаев 20-февралда маалымат жыйында билдирди.

18-февралда президент Алмазбек Атамбаев министр Кубанычбек Турдубаевди кабыл алып, өкмөт калк үчүн электр энергиясына болгон социалдык тарифти 1 киловатт-саатка 70 тыйындын деңгээлинде сактоого тийиш экенин айткан эле. "Бардык эсептөөлөрдөн кийин биз сунуш киргизишибиз керек. 70 тыйындык тарифти калтырууга болорун же болбой турганын азырынча айта албайм. Муну Отун-энергетикалык комплексин жөнгө салуу мамлекеттик агенттиги чечет",- деди министр.

Өкмөт жазында тарифтерди кайра көтөрүүнү пландоодо. Ага ылайык, 1-апрелден баштап абоненттер 700 киловаттка чейинки электр энергиясынын 1 киловатты үчүн азыркыдай 70 тыйындан эмес, 84 тыйындан төлөй башташат. Азыркы тарифтер боюнча абонент 700 киловатт электр энергиясы үчүн 70 тыйындан, андан ашканына 1 сом 85 тыйындан төлөйт.

Автор: Автандил Добулбеков