Асия Сасыкбаева Азербайжандын Кыргызстандагы элчиси менен жолугушту

Жогорку Кеңештин төрагасынын орун басары Асия Сасыкбаева бүгүн, 20-февралда Азербайжан Республикасынын Кыргызстандагы атайын жана толук ыйгарым укуктуу элчиси Гидаят Худуш оглу Оруджев менен жолугушту. Бул тууралуу Жогорку Кеңештин басма сөз кызматы билдирди.

Жолугушууда тараптар экономикалык жана маданий кызматташтык, парламенттер аралык байланыштарды өнүктүрүү маселелерин талкуулашты.

“Биз ТүркПА, ЕКПА сыяктуу уюмдарда Азербайжан менен өнөктөштүктү жогору баалайбыз. Эки өлкөнүн парламентчилери ар дайым иш тажрыйбалары менен бөлүшүп келүүдө”,- дейт вице-спикер А.Сасыкбаева. Ал Кыргызстандын Бакудагы элчилиги ачылгандыгын белгилеп, 2014-жыл өлкөлөр ортосундагы кызматташтыкты өнүктүрүү үчүн жемиштүү жыл болгондугуна токтолду.

Өз кезегинде элчи Гидаят Худуш оглу Оруджев Жогорку Кеңештин Азербайжан менен кызматташуу боюнча достук тобу жана Эл аралык иштер боюнча комитети менен конструктивдүү кызматташуу жолго коюлгандыгын билдирди. Ошондой эле ал өнөр жай, туризм, инвестиция тартуу жаатында кызматташууну жандандыруу зарылдыгын белгиледи.

Автор: Айпери Ганыжан кызы