Кыргыз жеринде өндүрүштүк жардыргыч заттарды сатуу, ташуу, сактоо иштерин мыйзамдуу жолго салуу демилгеленүүдө

Өндүрүштүк жардыргыч заттарды сатуу, ташуу, сактоо иштерин мыйзамдуу жолго салууга багытталган мыйзам долбоорун Жогорку Кеңеш 15-апрелдеги жыйынында экинчи окууда талкуулады.

Геология жана минералдык ресурстар боюнча мамлекеттик агенттигинин берген маалыматына караганда, мыйзам долбоорлорунда өлкө аймагында өндүрүштүк багыттагы жардыргыч материалдарды жүгүртүүдө пайда болуучу мамилелерди жөнгө салуунун укуктук негиздери жана принциптери аныкталат. Ошондой эле өндүрүштүк багыттагы жардыргыч материалдарды жүгүртүүдө коомдук коопсуздукка кылмыштуу кол салуулардын алдын алууга багытталган.

Долбоордо өндүрүштүк багыттагы жардыргыч материалдарды жүгүртүү үчүн мамлекеттик жөнгө салуу жана көзөмөл бөлүгүндө тиешелүү мекемелердин ортосундагы иш-милдеттерди кайрадан чектөө каралган. Жыйынтыгында эл өкүлдөрү демилгени 2-окууда добуш берүүгө жиберишти.

Автор: Нургазы Аматов