Жогорку Кеңештин делегациясы Германияга 3 күндүк иш сапары менен барды

22-апрелден тартып Жогорку Кеңештин делегациясынын Германиядагы үч күндүк иш сапары башталды.

Жогорку Кеңештин басма сөз кызматынан билдиришкендей, делегациянын курамында Жогорку Кеңештин 10 депутаты бар.

Иш сапардын алкагында Бундестагдын вице-президенти Йоханнес Зингхаммер, Бундестагдагы Борбордук Азия тобунун төрагасы Манфред Грунд, Бундестагдын Бюджет жана финансы боюнча комитетинин төрагасы менен, ошондой эле Федералдык каржы министрлигинде, Германиянын Федералдык банкында жолугушуулар болот.

Иш сапардын максаты - кыргыз-герман парламент аралык кызматташтыгын өнүктүрүү, герман тараптын бюджеттик жана каржылык тажрыйбаларын үйрөнүү, жаңы байланыштарды түзүү.

Берлин шаарындагы Гумбольд атындагы университеттин Борбор Азия кафедрасы менен бирге залкар жазуучу Чыңгыз Айтматовго арналган кече өткөрүү да пландаштырылууда. Ага кыргыз делегациясы, герман коомчулугу менен университеттин өкүлдөрү, Германиядагы кыргыз диаспорасы катышмакчы.

Автор: Жамалидин Парманкулов