Пара берип жаткан жеринен кармалган Туризм департаментинин директору Максат Чакиевдин соту жабык эшик артында өтүүдө

Маданият, маалымат жана туризм министрлигине караштуу Туризм департаментинин директору Максат Чакиевдин пара берүү фактысы менен кармалган ишин Бишкек шаардык Биринчи Май райондук соту карап жатат. Бул тууралуу 30-майда райондук соттун коомчулук менен байланышуу бөлүмү SUPER.KG порталына билдирди. Маалым болгондой, соттук отурум жабык эшик артында өтүүдө.

Айта кетсек, 2014-жылдын июль айында Чакиев чет элдик Ф.П. аттуу жарандын ишеничине кирүү менен ага Туризмди өнүктүрүү боюнча кеңештин мүчөлүгүн аныктаган жасалма күбөлүк берген. Иликтөө иштеринин жүрүшүндө департамент башчысынын бул кылыгы билинип, ал ишти жабуу үчүн ИИМдин 5-Башкы башкармалыгынын кызматкерине 2 миң доллар жана Ысык-Көлгө барып эс алып келүүнү сунуштап, 28-май күнү ал 92 миң сом пара берип жаткан жеринен кармалган.