"Кумтөр" кенинде жер астынан казуу жолу менен алтын табуунун 3 кемчилиги бар" дейт Дүйшөнбек Зилалиев

"Кумтөр" кенинде жер астынан казып алтын табуунун 3 кемчилиги бар. Бул тууралуу бүгүн, 10-июнда Жогорку Кеңештин жыйынында Геология жана минералдык ресурстар боюнча мамлекеттик агенттигинин башчысы Дүйшөнбек Зилалиев билдирди.

Анын айтымында, эгер "Кумтөрдө" жер астынан казуу ыкмасын гана колдонуу талабы коюлса, дагы 3-4 жыл керектелет. "Ошондой эле бул ыкма менен гана иш жүргүзүлсө, алтын 60 тоннага аз чыгарылат. Мындан тышкары өтө көп каражат сарпталат",- деп түшүндүрдү Зилалиев.

Айта кетсек, жыйында "Суу кодексине толуктоолорду киргизүү жөнүндө" мыйзамынын долбоору талкууланууда. Ага ылайык, мөңгүлөрдүн абалына же аларда камтылган суулардын сапатына таасир этиши мүмкүн болгон иш-аракеттерге жана муз даярдоо менен байланышкан иш-аракеттерге уруксат берилмекчи.

Буга чейин "Ата Мекен" фракциясы бул мыйзам долбоору "Центерра Голд Инк." компаниясынын кызыкчылыгы үчүн сунушталганын жарыялап, андан баш тарткан.

Автор: Нургазы Аматов