Президент Алмазбек Атамбаев Конституцияны өзгөртүүгө каршы

Өлкө башчысы Алмазбек Атамбаев Жогорку Кеңеште Баш мыйзамды өзгөртүүнү демилгелеп жатышкан фракция лидерлери Өмүрбек Текебаев, Феликс Кулов жана Чыныбай Турсунбековго кайрылуу жолдоп, аталган мыйзам долбоорун кайтарып алуу өтүнүчүн билдирди. Мындай маалыматты бүгүн, 27-июнда президенттик аппараттан кабарлашты.

Мамлекет башчынын “Кыргыз Республикасынын Конституциясына өзгөртүүлөрдү киргизүү жөнүндө” мыйзам долбоорун парламентке киргизген Жогорку Кеңештин депутаттары Феликс Куловдун, Өмүрбек Текебаевдин жана Чыныбай Турсунбековдун атына жазылган катында мындай деп айтылат: “Мыйзамдарды өркүндөтүү боюнча аткарылган зор иш үчүн жана Кыргыз Республикасынын мамлекеттүүлүгүн чыңдоого болгон умтулуу үчүн чын ниеттен ыраазычылык билдирем жана келе жаткан парламенттик шайлоонун алдында Конституцияга өзгөртүүлөрдү киргизүү боюнча сунушуңуздарды дагы бир жолу карап көрүүнү өтүнөм”.

Өлкө президенти Кыргыз Республикасынын Баш мыйзамынын айрым жоболорунун натыйжалуулугун талдоо боюнча депутаттар аткарган иш жогорку баага татыктуу экенин белгилейт: “Сиздер киргизген мыйзам долбоорун алдын ала талкуулоо анда камтылган сунуштардын көпчүлүгү эксперттик коомчулук жана Кыргыз Республикасынын шайлоочулары тарабынан олуттуу колдоо тапканын көрсөттү. Өзгөчө мамлекеттик бийлик бутактарынын өз ара аракеттешүүсүнүн туруктуу системин түзүү жолундагы жасалма тоскоолдуктарды алып салуу, элдин бийликке болгон ишенимин арттыруу, мыйзамдуулукту бекемдөө жана карапайым жарандардын укуктарын сактоо сунуштары колдоого алынууда”.

Ошол эле учурда президент А.Атамбаев төмөнкүдөй пикирин кошумчалайт: “...Мыйзам долбоорундагы айрым сунуштар коомдо курч талаш-тартыш жаратты. Мыйзам долбоорун алдын ала талкуулоо үчүн бөлүнгөн убакыт жетишсиз экендиги да анык болуп калды. Ошондуктан маселелердин өтө олуттуу экендигин эске алып, мыйзам долбоорун кайра чакырып алуу өтүнүчү менен сиздерге кайрылууну туура көрдүм. Чогуу иштешкен акыркы беш жылда биз нечен жолу өлкө алдында турган маселелерди чечүү боюнча кыйын, бирок туура чечимдерди таап келгенбиз. Алдыда боло турган парламенттик шайлоолордун жүрүшүндө шайлоочулар менен бирге кырдаалды дагы терең талдап, азыр сунушталып жаткан оңдоолордун туура экендигине ынансак, бул демилгелерге Кыргыз Республикасынын жаңы чакырылыштагы Жогорку Кеңешинде кайрылууга мүмкүндүк болоруна ишенем”.

Жогорку Кеңештеги өздүк булактардын билдиргенине караганда, фракция лидерлери президенттин өтүнүчүн кабыл алышты.

Автор: Соңку кабар