"Административдик ишмердүүлүктүн жана административдик жол-жоболордун негиздери жөнүндө" мыйзамга кол коюлду

Кыргыз Республикасынын Президенти Алмазбек Атамбаев «Административдик ишмердүүлүктүн жана административдик жол-жоболордун негиздери жөнүндө» мыйзамга кол койду. Бул тууралуу 6-августта президенттин басма сөз кызматы билдирди.

Мыйзам Кыргыз Республикасынын Жогорку Кеңеши тарабынан 2015-жылдын 29-июнунда кабыл алынган.

Мыйзамдын максаты – мамлекеттик органдардын, жергиликтүү өз алдынча башкаруу органдарынын жана алардын кызмат адамдарынын башкаруу жана административдик ишмердүүлүгүн оптималдаштыруу, унификациялоо.

Мыйзамдын жоболору менен коомдук-укуктук мүнөздөгү административдик ишмердүүлүктүн негиздери аныкталат, административдик органдар менен жеке, юридикалык тараптардын административдик жол-жоболорду ишке ашыруудагы укуктук мамилелери жөнгө салынат, административдик органдардын административдик актысына, аракетине жана аракетсиздигине даттануунун, административдик актыны аткаруунун, административдик чыгымдарды өндүрүп алуунун, административдик жол-жоболордон улам келтирилген зыяндын ордун толтуруунун тартиби аныкталат.

Мыйзам расмий жарыяланган күндөн тартып тогуз ай өткөндөн кийин күчүнө кирет.

Автор: Айпери Ганыжан кызы