Асылбек Жээнбеков: "Кыргыз эли таза шайлоону күтүүдө, бул нерсе өлкө жетекчилигинин көзөмөлүндө"

Жогорку Кеңештин төрагасы Асылбек Жээнбеков 20-августта Бириккен Улуттар Уюмунун Башкы катчысынын атайын өкүлү Петко Драгановду кабыл алып, тараптар Кыргыз Республикасынын БУУ тутуму менен кызматташтыгын, өлкөдөгү реформаларды, парламенттик шайлоого тийиштүү маселелерди талкуулашты.

"Сиздердин өкүлдөрдүн аракети аркылуу Кыргыз Республикасы менен кызматташууга байланышкан маселелер дайыма БУУ жетекчилигинин көңүл чордонунда болду",- деген төрага жакында БУУнун Башкы катчысы Пан Ги Мундун кыргыз өлкөсүнө жасаган иш сапарынын маанисин белгиледи.

Тараптар аймактык деңгээлде мамлекеттердин өз ара аракетине жана терроризм, экстремизм, наркотрафик, чек аралар аралык уюшкан кылмыштуу топтор сындуу азыркы учурдагы коркунучтарга биргелешип каршы туруу маселелерине көңүл бурушту.

Спикер социалдык-экономикалык көйгөйлөрдү чечүүгө киришкен мамлекеттин аракетин, конфессиялар аралык мамилелер жаатында салмактуу саясат жүргүзүү, алардын экстремисттик агымдарына каршы күрөшүү зарылчылыгын белгиледи. Парламенттик шайлоо тууралуу: "Жогорку Кеңешке шайлоонун калыс, атаандаштык негизде өтөрү болжонууда. Бул маселе өлкө жетекчилигинин көзөмөлүндө турат, кыргыз мамлекетинин жарандары таза шайлоону күтүшүүдө",- деп билдирди.

Автор: Автандил Добулбеков