Түркиянын Анталия шаарында жардыруу болду

Бүгүн эртең менен Түркиянын Анталия шаарында жардыруу болду. Бул тууралуу бүгүн, 25-октябрда чет элдик маалымат каражаттары жазышты.

Маалыматка караганда, жардыруу Соода-өнөр жай палатасынын унаа токтотуучу жайында болгон. Шаар мэри Мендерес Тюрелдин айтымында, жабыркагандардын саны 12ге жеткен.

Мендерес Тюрел жергиликтүү телеканалдардын бирине берген маегинде: “Жардыруу унаа токтотуучу жайда болгон. Кырсыктын кесепетинен кээ бир имараттардын жана унаалардын айнектери сынган. Азырынча жардыруунун келип чыгуу себептери такталууда”, - деди.

Кыргыз Республикасынын Тышкы иштер министрлигинин маалыматында, жардыруудан жабыркагандардын арасында өлкөбүздүн жарандары жок.

Автор: Бекжан Рыскулов