Москвадагы "Коломенская" станциясында газ баллон жарылып, 6 адам жабыркады. Арасында кыргыз жарандары бар же жогу такталууда

Бүгүн, 22-декабрда Москва шаарындагы "Коломенская" станциясына барчу өтмөктө газ баллон жарылып, 6 адам ар түрдүү жаракаттарды алды. Бул тууралуу Москва шаардык башкы тергөө башкармалыгынын Тергөө комитетинен жергиликтүү маалымат булактарына билдиришти.

"Аталган станцияга жакын жерде оңдоп-түзөө иштери жүрүп жатканда газ жарылып, натыйжада 6 адам жабыркады. Алардын экөө ооруканага жаткырылды", - деп жазылат маалыматта.

Кырсыкка кабылган 6 адамдын арасында Кыргыз өлкөсүнүн жарандары бар же жок экенин билүү үчүн ТИМдин өкүлү Айымкан Кулукеевага кайрылдык. "Бул боюнча министрликтен Кыргыз Республикасынын Орусиядагы элчилигине маалыматты тактоо керектиги тууралуу тапшырма берилди. Учурда тактоо иштери жүрүп жатат", - дейт Кулукеева.

Бул арада ТАСС маалымат агенттиги кырсык болгон жерде оңдоп-түзөө иштерин жүргүзүп жаткан компания жасап жаткан ишинен четтетилгенин жазып чыкты.

"Оңдоп-түзөө иштерин жүргүзүп жаткан жалдануучу компания иштен четтетилди. Бул боюнча шаардык прокуратура иш алып барып, тергөө иштери жүрүүдө", - деп жазылат маалыматта.

"Коломенская" станциясындагы иштерди "Рост-Е" ишканасы жүргүзүп жаткан.