Ош шаарында "эки бир тууганды бычактаган" деп шектелген жаран кармалды

Ош шаарында "эки бир тууганды бычактаган" деп шектелген жаран кармалды. Бул тууралуу бүгүн, 7-февралда Ош шаардык ички иштер башкармалыгынан билдиришти.

Маалыматка караганда, окуя 5-февраль күнү саат 17:00 чамасында Ленин көчөсүндө жайгашкан заводдун имаратында болгон. Анда шаар тургуну өз ара пикир келишпестиктерден улам 39 жаштагы А.Кны жана анын 26 жаштагы иниси А.Ону бычак менен сайып салган. Учурда жабырлануучулар ооруканада. Ал эми кылмышка шектүү милиция кызматкерлери тарабынан кармалып, убактылуу кармоочу жайга киргизилди. Анын үстүнөн кылмыш иши козголуп, тергөө амалдары жүрүүдө.

Автор: Бекжан Рыскулов