Айпери Медет кызы Париж Олимпиадасында тарых жаратууга үмүттөнүп жатканын айтты (видео)

Дүйнөлүк күрөш уюму белгилүү кыргыз балбаны Айпери Медет кызы тууралуу даярдаган видеосун жарыялады.

Анда Айпери Токиодогу Олимпиадада жаш болгондуктан байгелүү орунду ала албай калганын, бул жолу алтын тагынып өлкө тарыхын жаратуучулардан болуу кыялы экенин айткан.

"Бул Олимпиадада алтын медаль тагынсак, Кыргызстан үчүн абдан чоң ийгилик жана тарых болот деп айта алам. Аткени азырынча биздин өлкөдө олимп оюндарынан алтын байге жок. Кыргызстандын тарых жараткан, тарых жазган кыздарынын бири болом деп үмүттөнөм", - деген ал.

Ошондой эле спортчу өлкөдө күрөш өнүгүп жатканын белгилеп, "Азыр биздин аркабыздан өсүп келе жаткан жаш кыздар аябай көп. Мурдагыга караганда эркин күрөш өлкөбүздө өнүктү десем болот" деп айткан.