АКШнын аба күчтөрү Ирандын үч өзөктүк объектисин талкалады. Трамп эмне дейт?

Дональд Трамп Ирандын өзөктүк куралдарды даярдоочу жана сактоочу үч объектисине чабуул коюп, АКШнын аба күчтөрү ал жерлерди жок кылганын билдирди.

Масштабдуу чабуулдан соң америкалык лидер кайрылуу жасады.

Алардын негизгилери:

- Трамп Бишкек убактысы боюнча таңкы саат 6да Иранга кол салуу тууралуу билдирди: анын айтымында, соккулар Фордо, Натанз жана Исфахан шаарларында болгон;

- Кол салуу, Америка президентинин айтымында, "абдан ийгиликтүү болду";

- Дароо эле АКШ президенти Тегеранды тынчтыкка чакырып, Американын соккусун тарыхый учур деп атады;

- Чабуул үчүн B-2 стратегиялык бомбалоочу учактары, бункер бустерлери жана "Tomahawk" канаттуу ракеталары колдонулган. Булар Ирак, Ооганстандагы согушта ийгилик жараткан жабдыктар;

- Андан 2 саат өтүп Трамп элге кайрылып, Ирандын уран байытуу боюнча негизги объектилери толугу менен жок кылынганын айтты;

- Кайрылууда ал дагы Иранды “тынчтыкка” чакырды, антпесе АКШ жаңы соккуларды баштайт;

- Трамп АКШнын Ирандын өзөктүк объектилерине жасаган соккусу Тегеранды кайрадан сүйлөшүүлөргө алып келет деп үмүттөнөт;

- АКШ Иран менен байланышка чыгып, алар сокку урууларды гана пландап жатышканын жана Тегерандагы өкмөттү алмаштыруу максатын көздөшпөгөнүн билдиргенин Америка телеканалы билдирди;

- Тегеран бул чабуулдарды күткөнүн, ошондуктан орду толгус зыян болгон жок деп ырастоодо;

- Трамп АКШнын Иранга кол салуусунан кийин Израил коопсуз экенин айтты;

- Ал эми Израилде ишмердүүлүккө чектөө киргизилип, өлкөнүн бардык аймагында чогулуштарга жана машыгууларга тыюу салынды;

- Пентагон соккулар боюнча АКШнын соккусуна байланыштуу түштөн кийин маалымат жыйынын өткөрөт.

Автор: Замира Ниязбекова