Нуркамил Мадалиев: "Солтон-Сарыда өз алдынча кен казгандар күнүнө 400 сом гана табышууда"

"Солтон-Сары жайлоосундагы кокту-колоттордо өз бетинче иштеп жаткан кен казуучулар атайын адистиги бар өкүлдөр эмес. Алар "жапайы" ыкмага салып иштешип, күнүмдүк тапкан акчасы болгону 400 сомдон бааланып жатыптыр". Мындай пикирди депутат Нуркамил Мадалиев 11-февралда "Парламент" радиосундагы маегинде билдирди.

Депутаттын айтымында, мыйзамсыз иштеп жатышкан карапайым жумушчулардын тапкан продукцияларын кимге өткөрөрү такталып, мамлекет кен байлыктарды иштетүүнүн жаңы ыкмаларын иштеп чыгышы керек. "Кен байлыктарынын запасы 100 килограммга жетип-жетпеген деле аймактар бар. Андай аз көлөмгө инвесторлордун келиши кыйын. Ошондуктан кен байлыктарды иштетүүдө мамлекет жергиликтүү шарттагы ишти тартып кете ала турган тараптарга да мүмкүнчүлүк бериш керек",- дейт Мадалиев.

Автор: Автандил Добулбеков