Акыркы суткада өлкөдө 9 өрт кырсыгы катталып, Арча-Бешик жаңы конушунда соода күркөсү күйүп кетти

Жарандык коргонуунун Өрткө каршы күрөшүү кызматынын маалыматы боюнча, өткөн суткада республиканын аймагында 9 өрт кырсыгы катталып, өрттөрдү өчүрүүгө 9 өрт өчүрүү бөлүмү тартылган. Бул тууралуу бүгүн, 2-мартта Өзгөчө кырдаалдар министрлигинен билдиришти.

Борбордогу Арча-Бешик конушунда калай менен жабылган, аянты 35 чарчы метр азык-түлүк сатуучу дүкөнчөнүн ички жыгач жасалгасы, муздаткыч, азык-түлүктөрү күйүп кетти. Ошондой эле Талас облусундагы Көк-Ой айылында жыгач устундуу, шифер жабылган, аянты 50 чарчы метр курулуш чарбанын чатыры күйүп кетти. Өрттүн келип чыгуусуна электр жабдууларын куроодо эреженин бузулушу себеп болгон.

Автор: Мальвина Уметбекова