Сайдулла Нышанов Ош-Бишкек жолунун Суусамырдагы бөлүгү оңдоого муктаж экенин айтты

Парламенттин 7-майдагы жыйынында депутат Сайдулла Нышанов Бишкек-Ош трассасынын Суусамырдагы бөлүгү оңдоого муктаж экенин билдирди. "Кышы менен кар алдында жаткан жолдун кээ бир жерлери тешилип калыптыр. Жолдогу чуңкурга түшүп кетип унаасы бузулган 3-4 айдоочуну көрдүм. Суусамырдагы жолду тезинен оңдоо керек, анткени бул жол өлкөбүздүн жарандары үчүн абдан маанилүү. Миңдеген жарандар ушул жол аркылуу көптөгөн иштерин бүтүрүп жатышат",- дейт депутат.

Айта кетсек, 5-майда премьер-министр Темир Сариев транспорт жана коммуникация министрине өлкөдөгү жолдордун абалына тезинен мониторинг жүргүзүү тапшырмасын берген.

Автор: Автандил Добулбеков