Бишкектеги 4 райондо "Ата Мекен" социалисттик партиясынын конференциялары болуп өттү

6-7-июнь күндөрү Бишкектеги Октябрь, Свердлов, Биринчи Май жана Ленин райондорунда "Ата Мекен" социалисттик партиясынын конференциялары болуп өттү. Бул тууралуу партиянын басма сөз кызматынан билдиришти.

Конференцияда "Ата Мекен" социалисттик партиясынын түзүлгөн күнүнөн баштап азыркы күнгө чейинки тарыхый жолу тууралуу тасма тартууланып, Бишкек шаардык конференциясына делегаттар көрсөтүлүп, "Ата Мекендин" партиялык уюмдарынын райондук кеңештеринин жаңы мүчөлөрүн шайлоо маселеси каралды. Партиялык форумдун ишинин жыйынтыгында Бишкек шаардык жалпы конференциясына төрт райондон 100дөн 400 делегат шайланды. Райондук партиялык уюмдардын төрагаларынын, Бишкек шаардык кеңешинин депутаттарынын баяндамалары угулуп, партиянын максат-милдеттери талкууга алынды.

Демократияны бекемдөөгө, коомдук аң-сезимди калыптандырууга, мыйзамдуулукту жана элдин эркиндигин коргоо боюнча туруктуу ишмердүүлүккө кошкон салымы үчүн "Ата Мекен" социалисттик партиясынын жигердүү мүчөлөрү Ардак грамота менен сыйланышты.

Иш-чарага Жогорку Кеңештин депутаттары Р.Төлөгөнов, Н.Никитенко, Бишкек шаардык кеңешинин депутаттары С.Салиев, А.Сариев, Р.Аматов, У.Максымбеков, Т.Сариев, "Ата Мекен" социалисттик партиясынын шаардык кеңешинин төрагасы К.Токтосартов, ошондой эле партиянын 900дөн ашуун активдүү мүчөсү катышты.