"Кумтөрдө" иштегендер "айлыгыбыз 50 пайыз көтөрүлсүн, болбосо иш таштайбыз" деген талап коюшууда

"Кумтөр" ишканасынын кызматкерлери айлыктарын 50 пайызга көтөрүү талабы менен компания жетекчилигине кайрылуу жасашты. Алар мындай талабын доллардын кескин көтөрүлүшү менен байланыштырышууда. "Кумтөрдүн" профсоюз уюмунун төрагасы Авазбек Кожакматовдун билдиришинче, ишканада иштегендердин 80 пайызы банктардан доллар менен насыя алышкандар. Алар алган насыянын жалпы суммасы 7 миллион доллар экени айтылды.

Алтын америкалык валютада сатылганы менен, айлыктардын сом менен берилери белгиленди. "Жумушчулар насыяларын төлөй албай жатышат. Талаптарыбыздан баш тартылса, кескин чараларга, иш таштоого чейин барышыбыз мүмкүн",- дейт компания кызматкери Камчыбек Кыдыргычев.

Азыркы учурда администрация менен профсоюз уюмунун ортосунда сүйлөшүү жүрүп жатканы маалымдалды.

Автор: Автандил Добулбеков