"Жазаларды аткаруу кызматынын жетекчиси Алик Мамыркулов кызматтан кетүүгө даяр экен, өкмөт аны эмнеге кетирбей жатат?" деди депутат Момбеков

"Жазаларды аткаруу кызматынын жетекчиси Алик Мамыркулов кызматтан кетүүгө даяр экенин айтты",- деди депутат Рыскелди Момбеков Жогорку Кеңештин 10-декабрдагы жыйынында. Депутат Момбеков өкмөт башчы Темир Сариев Мамыркуловду эмнеге кызматтан кетирбей жатканына кызыкты. "Эки күн мурун Алим Мамыркулов комитеттин жыйынында №50-СИЗОдогу окуяга күнөөлүү экендигин айтып, кызматтан кете турганын билдирди. Өкмөт башчы эмнеге кызматтан кетирбей жатат?"- деди депутат.

Эске салсак, 12-октябрга караган түнү Төмөнкү-Нооруз айылында жайгашкан №50-абактан жалпы 9 адам качып чыккан. Абактан качкан кылмышкердин колунан Жаза аткаруу мамлекеттик кызматынын кызматкерлери Таалайбек Өмүрзаков, Туратбек Садыбакасов, Орозбек уулу Фархат ошол күнү каза болушса, оор жаракат алган Тилек Абылгазиев ооруканада өзүнө келбей жатып жан берген.

Качып чыккан кылмышкерлердин бешөөсү ошол эле түнү МАИ кызматкерлери тарабынан колго түшүрүлгөн. Кармалгандардын арасынан үч кылмышкер: Муратбек Жумалиев, Таалайбек Жуманов жана Бакыт Кенжегулов жүрөк оорусу, дем алуу органдарынын жабыркашынан жана баш сөөгүнөн алган жаракатынан түрмөдө каза болушту.

Качып чыгып издөөдө жүргөн Данияр Кадыралиев Дордой конушунда 16-октябрда, 28 жаштагы Азамат Мусуралиев 20-октябрда Сокулукта өлтүрүлгөн. Издөөдө жүргөн кылмышкерлердин бири Эдил Абдрахмановду 22-октябрда кармоо учурунда анын бутуна ок тийген эле. Ага Чүй облустук ооруканасында операция жасалды.

Ал эми Алик Мамыркуловдун буйругу менен "коом үчүн коркунучтуу кылмышкерлердин түрмөдөн качуусуна жеткирген олуттуу каталарды кетиргени үчүн" деп №50-СИЗОнун бир топ жетекчилери иштен алынган. Алардын катарында Иманкул Телтаев да айыпталып, ЖАМК "тергөөнүн жыйынтыгына жараша Телтаев тийиштүү жазасын алат" деп билдирген эле. Телтаев №1-СИЗОнун медициналык бөлүмүндө шейшеби менен асынып алган.

Автор: Жамалидин Парманкулов