Малайзиялык университет Кыргыз Республикасынын 10 студентине орун бөлдү

Кыргыз Республикасынын Малайзиядагы элчилиги 2015-жылдын башында Малайзиянын эл аралык университеттери менен кызматташтыкты жандантууну демилгелеп, мунун алкагында кыргыз мамлекетинин студенттерине малайзиялык жогорку окуу жайлардан гранттык-стипендиялык орун бөлүү мүмкүнчүлүгү талкууланган.

Бүгүнкү күндө кыргыз өлкөсүнүн студенттерине 10 стипендиялык орун бөлүү боюнча Малайзиянын "KolejMentari" университетинен сунуш түшкөнүн бүгүн, 4-февралда КРнын Малайзиядагы элчилигинен кабарлашты.

Маалымат үчүн: "KolejMentari" 1999-жылы негизделген жеке менчик жогорку окуу жай. Башында маалыматтык жана коммуникациялык технологиялар тармагында билим берүүгө багытталса, 2006-жылы өзүнүн Укук мектебин ачкан. Ал эми 2007-жылы Бизнес мектеби, андан кийин Илим жана маалыматтык технологиялар мектеби ачылган.

Кыргыз өлкөсүнүн студенттеринин малайзиялык жогорку окуу жайларда окуусу үчүн элчилик Малайзиянын башка университеттери менен да сүйлөшүүлөрдү жүргүзүп жатканы айтылды.

Автор: Автандил Добулбеков