Кыргыз жериндеги кыргыз тилдүү сайттардын сап башында турган SUPER.KG порталы Жаңы жылды жаңы рекорд менен тосуп алды. 2017-жылдын соңунда “М-Вектор” консалтинг компаниясы медиа рынокту иликтөө максатында сурамжылоо жүргүзүп, анын жыйынтыгында Кыргыз жергесиндеги кабар таратуучу сайттардын эң алдыңкысы деп SUPER.KG порталын тапты.
Google Analytics рейтинг аныктоочу ресурсунун көрсөткүчү боюнча, SUPER.KG порталы 2017-жылы дээрлик 336 миллиондон ашуун жолу каралган. Ал эми уникалдуу колдонуучулардын саны 5 миллион 261 миңден ашкан.
Mail.ru’нун көрсөткүчү боюнча, SUPER.KG порталы КМШ өлкөлөрүндөгү эң популярдуу жалпыга маалымдоо каражаттарынын веб-порталдарынын алдынкы он бештигинде ишенимдүү келе жатат. Mail.ru’нун статистикасы боюнча, 2017-жылы SUPER.KG порталына баш баккан уникалдуу колдонуучулардын саны 8 миллион 771 миңден ашса, ал эми кароолордун саны 332 миллиондон көп болгон.
Көрсөткүчтөргө көңүл буралы. Кыргыз жергесинде сайттардын статистикасын жүргүзүүчү Net.kg кызматы 2017-жылдын ичинде бир канча ирет SUPER.KG порталын бардык көрсөткүчтөр боюнча 1-орунга чыкканын жарыялап турду. Net.kg кызматынын статистикасы боюнча, өткөн жылы SUPER.KG порталына баш баккан уникалдуу колдонуучулардын саны 2 миллион 199 миңден ашса, ал эми кароолордун саны 337 миллиондон көп болгон.