Сириялык фотограф жаракат алган баланы куткарып жаткан кесиптешин сүрөткө тартып, ал үчүн 120 миң доллар сыйлыкка ээ болду. Бул тууралуу чет элдик басылмалар жазып чыгышты.
Маалым болгондой, фотокабарчы Мохамед Альрагеб "Hamdan International Photography Award" деген аталыштагы эл аралык фотосынакка катышып, жыйынтыгында анын сүрөтү баш байгени жеңип, 120 миң доллар акчалай сыйлык алган. Ал өзүнүн кесиптеши Абд Алькадер Хабактын жардыруудан жаракат алган кичинекей баланы куткарууга аракет кылып жатканын сүрөткө тартып алган.
Окуя 2017-жылдын апрель айында Батыш Алепподо орун алган. Эки сүрөтчү өз иштери менен алек болуп жатканда, алардан алыс эмес жерде жардыруу болгон. Хабак камерасын таштап, жаракат алгандарга жардам берүү үчүн чуркап кеткен.
"Кичинекей балдардын ыйын, алардын өлүм алдында жатышканын көрүү оор болду. Андыктан камераны таштап, аларга жардам берүүнү чечтик. Мен кичинекей баланы колума кармап, чуркап бара жатканда кимдир-бирөө аны өлүп калган деп айтты. Бирок ал өлгөн эмес болчу. Мен анын араң дем алып жатканын сезип жаттым", - деген Хабак.
Белгилүү болгондой, сүрөттүн авторунан сырткары, каарманы болгон Хабакка жогоруда аталган сынактын уюштуруучулары тарабынан тайманбастыгы жана эрдиги үчүн сыйлык тапшырылган.
