Тажикстандын Дүйшөмбү шаарында расмий түрдө никеге турбаган түгөйлөр эми сауналарга киргизилбейт. Бул тууралуу Азаттыктын тажик кызматы жазды.
Маалыматка ылайык, сауна кожоюндары эс алуу үчүн келген жуптар нике күбөлүгүн көрсөтүшү керек экенин тастыкташты. Ал эми аталган өлкөнүн ИИМинин маалымат катчысы бул эреже сауналарды сойкулук үчүн көмүскө жайларга айлантуунун алдын алуу үчүн киргизилгенин билдирген. Мындай тартип 22-октябрдан тартып иштей баштаган.
“Жаңы эреже тууралуу билген эмеспиз. Андыктан жаныбызда күбөлүк жок болчу, жубайым экөөбүз эрди-катын экенибизди далилдей алган жокпуз. Жуунбай үйгө кетүүгө туура келди. Сауна ээлери бул шаар бийлигинин талабы экенин айтышты”, - деген мындай тартипке туш болгон Дүйшөмбү шаарынын жашоочусу.
Сауналар менен катар мейманканалар да шаар бийлигинен эскертүү алгандыгы жазылат маалыматта.
