Депутат Назаров: "Сатыкка коюлган мамлекеттик объектилердин артында кызыкдар тараптар бар"

Мамлекетке пайда алып келип жаткан мекемелерди сатпаш керек. Бул тууралуу бүгүн, 5-ноябрда Жогорку Кеңештин комитет жыйынында депутат Айтмамат Назаров билдирди.

Эл өкүлү сатыкка коюлган айрым ишканалардын артында кызыкдар тараптар бар экенин айтты.

"Сатыкка коюлган айрым объектилердин кардары болушу мүмкүн. “Росинбанкты" сатуу боюнча тизмеден чыгаруу керек. Анткени өздөрү жок болуп кетүү алдында турган банкты "сатабыз" деп тизмеге киргизсеңер, баасы түшүп кетет. "Найман ГЭСти" да сатыкка коюптурсуңар, ага окшогон инвестиция керек болгон ГЭСтер толтура, эмнеге башкалар сатылбайт? Ошондой эле мамлекеттик аңчылык чарбалардын арасынан бирөө эле сатыкка коюлууда", - деди Назаров.

Мамлекеттик мүлктү башкаруу фондунун төрагасы Ренат Түлөбердиев сатыкка коюлган объекттер кандай жол менен тизмеге киргизилгенин билбей турганын айтты.

Ал эми депутат Айтмамат Назаров кайсы бир мамлекеттик объектилерди сатылуучу объектилердин тизмесине коштурбоо боюнча депутаттын эшигин каккылап жүргөн адамдар бар деген пикирин айтты.

Автор: Сталбек Абдижалил уулу