Депутат: "Үйлөрдө мал союуга тыюу салынса, балдар мал союуну билбей калышат"

Депутат Асылбек Жээнбеков үйлөрдө мал союуга тыюу салынса, балдар мал союуну билбей калат деген пикирин айтты. Бул тууралуу ал бүгүн, 17-февралда Жогорку Кеңештин комитет жыйынында билдирди.

Жыйында “Жаныбарларды коргоо жөнүндө” мыйзам долбоору каралууда. Баяндаманы Ветеринардык жана фитосанитардык коопсуздук боюнча мамлекеттик инспекциянын директору Калысбек Жумаканов жасап жатат.

Асылбек Жээнбеков малды идентификациялоо иши жүрүп жатканын айтты. “Үйлөрдө мал союу болбош керек деп айтып кеттиңиз. Анда биз кыргыз болбой калабыз да. Балдар мал союуну билбей калышат. Биз кыргыздар мал союуну унутпай келе жатканыбыз менен айырмаланабыз. Ал эми этти сатууга чыгарса анда башка кеп. Жакшылык-жамандыкта текшерилген малды сойсо болот да”, - дейт Жээнбеков.

Автор: Жылдыз Джускембаева