"Кечирип кой" деп обон созуп интернет жылдызына айланган Байзактын маеги

Интернет желесине төкмө акын Замирбек Үсөнбаевдин "Кечирип кой" чыгармасын дасторкон четинде отуруп ырдаган баланын видеосу жарыяланган.

Анда кичинекей баланын заңкылдап обон созуп жатканын көрүүгө болот. Тасма көпчүлүктүн кызыгуусун арттырып, алкоосуна татыган. Ага жылуу сөздөрүн айтып, ийгилик каалагандардын саны арбын.

SUPER.KG порталы кичинекей баланы таап, апасы менен шаарга келген жеринен чакырып маектешти.

Интернет жылдызына айланган Байзак Кубанычбек уулу 13 жашта. Ал Жумгал районунун Беш-Терек айылынын тургуну. Үй-бүлөдө 5 бир туугандын эң кенжеси.

Байзактын апасы Айсулуу Мураталиева уулунун интернетке чыккан видеосу тууралуу төмөндөгүчө айтып берди.

"Уулум биринчи жолу "Мен дүйнөнү апам менен тааныгам" деген ырды биздин жаныбызда эле отуруп ырдап калды. Атасы экөөбүз угуп, биздин балабыздын өзгөчө үнү бар турбайбы деп таң калып калдык. Анан интернетке жарыяланган видео болсо аяштарыбыздын үйүнө конокко барганбыз. Негизи мындай жерлерде ырдап эле жүрөт, анан бир аяшыбыз тартып алыптыр. Ал эжесине жөнөтүп, ошондон улам элге тарап кетиптир. Мен ушул жумурай-журтка ыраазычылык билдирет элем. Балам али жаш, ошого карабай аябай жакшы сөздөрүн айтып, жазып жаткандары кубандырды",- дейт Мураталиева.

Маекти толугу менен төмөнкү видеодон көрө аласыздар.