Франциялык ПСЖ клубунун оюнчусу Лионель Месси жетинчи ирет "Алтын топ" сыйлыгын жеңип алды. Бул тууралуу чет элдик спорт басылмалары жазды.
Сыйлык тапшыруу салтанаты кечээ, 29-ноябрда Франциядагы Шатле театрында болуп өткөн. Кезектеги "Алтын топ" үчүн эң негизги талапкер катары 7 футболчу алдыга озуп чыккан. Топтолгон упайлардын жыйынтыгында аргентиналык форвард 613 упай менен "Алтын топтун" жеңүүчүсү деп табылды.
Сыйлыкка башкы талапкер футболчулардын топтогон упайлары төмөнкүдөй:
1. Лионель Месси (ПСЖ) - 613
2. Роберт Левандовский (Бавария) - 580
3. Жоржиньо (Челси) - 460
4. Карим Бензема (Реал Мадрид) - 239
5. Н'Голо Канте (Челси) - 186
6. Криштиану Роналду (Манчестер Юнайтед) - 178
7. Мохаммед Салах (Ливерпуль) - 126
34 жаштагы футболчу быйылкы жылдагы негизги атаандашы делген футболчу Роберт Левандовскийден 33 упайга көбүрөөк алган. Ал эми Мессинин ар дайымкы атаандашы Криштиану Роналду бул ирет талапкерлердин тизмесинде 6-сапка түшүп калды.
Лионель Месси Ла лигада 30 гол киргизип мыкты бомбардир аталган. Мындан тышкары Аргентина менен алгачкы ирет Америка Кубогун жеңип алган. Ал эми жаңы сезондун башталышында ал Франциянын ПСЖ клубуна өткөн.
Сыйлык тапшыруу аземинде Бавария клубунун чабуулчусу Роберт Левандовский бул жылы алгачкы ирет берилип жаткан "Жылдын мыкты чабуулчусу" наамына ээ болду. "France Football" мындан бир канча күн мурда "Алтын топ" менен бирге дагы бир сыйлык тапшырыларын маалымдаган эле.
Белгилей кетсек, "Алтын топ" футболдогу эң престиждүү сыйлык. Ал жыл ичинде жараткан ийгиликтердин, футбол сүйүүчүлөрү жана футбол адистеринин добуш берүүсүнүн жыйынтыгында ар жылы бир футболчуга тапшырылат. Учурда бул сыйлыкка ээ болгондордун сап башында Лионель Месси турат (2009, 2010, 2011, 2012, 2015, 2019, 2021). Ал эми Мессиге башкы атаандаш Криштиану Роналду 5 ирет "Алтын топту" жеңип алган (2008, 2013, 2014, 2016, 2017).
Былтыркы жылы пандемияга байланыштуу сыйлык эч кимге берилген эмес.
