Баткенден Бишкекке эвакуацияланган эл үйүнө кете албай жатабы?

Бишкек шаарындагы Каба уулу Кожомкул атындагы Спорт ордосунда Баткен облусунан эвакуацияланып келген айрым жарандар үйлөрүнө кете албай жатканын айтууда.

Аларды Өзгөчө кырдаалдар министрлиги жашаган жерине бекер жеткирерин УКМК төрагасы Камчыбек Ташиев айткан. Ошого байланыштуу эртең мененки саат 7ден бери Спорт ордосунун алдына чогулуп, күтүп турушат.

Алардын басымдуу бөлүгү аксакалдар, жаш балдар жана аялдар экенин билдиришти.

УКМК төрагасы журналисттердин суроолоруна жооп берип жатып, Баткендеги кандуу окуяда коопсуз жайларга көчүрүлгөн эл үйлөрүнө кайтса болорун айткан. Шарты жокторго мамлекет көмөк көрсөтөрүн билдирген.

Ал эми Өзгөчө кырдаалдар министрлиги баткендиктерди өз үйүнө акысыз жеткирүү иштери жүргүзүлүп жатканын билдирди.

"Министрлик тарабынан атайын транспорт уюштурулуп жатат. Эвакуация болуп келген элди өз үйүнө жеткирүү уланып жатат. Азыр эле Спорт ордосуна 7 унаа жиберилди. Эгерде жетпесе, дагы жиберебиз", - дешти министрликтен.