Эне тилге эки мүнөт: "Түлкү тиштемей", "жылан төө кылуу" фразеологизмдеринин маанисин билесизби?

"Эне тилге эки мүнөт" рубрикабызда "каны катуу", "жылан төө кылуу", "бармак басым", "өлбөгөн төрт шыйрагы калуу" жана "түлкү тиштемей" фразеологизмдеринин маанилерин чечмелейбиз.

Каны катуу - Тили оозуна батпай абдан суусоо, чаңкоо. Мисалы, Ошол калың топтун ичинде туруп, кайдагы суу. Каның катып калса да чыдайсың (Айтматов).

Жылан төө кылуу - Барктануу, баалануу, маалкатуу, кербезденүү деген мааниде колдонулат. Мисалы, Мынча эмне жылыңды төө кыласың?

Бармак басым - Кичинекей, кенедей, бармактын ордундай. Мисалы, Оң далынын үстүнөн бармак басым жери ооруп турганын айтты («Ала-Тоо»).

Өлбөгөн төрт шыйрагы калуу - Абдан катуу уят болуу, жети өмүрү жерге кирүү, уялганынан баш көтөрө албай калуу. Мисалы, Борбук молдонун өлбөгөн төрт шыйрагы калды белем, бир кызарып, бир бозоруп, күрөө тамыры да көбө түшту (Баялинов).

Түлкү тиштемей - Түрдүүчө амал менен алдаган деген мааниде. Мисалы, Эми мага түшүнүктүү. ...Баятан бери түлкү тиштемей ойногонуңуз үчүн ыракмат! - деп ордуман турдум (Жантөшев).