Таласта киши тоноого шектүүлөр кармалды

Таласта каракчылыкка шектелген жарандар кармалды. Бул тууралуу бүгүн, 18-майда облустук милициядан билдиришти.

Маалыматка ылайык, 8-мартта милицияга Талас шаарынын тургуну 1978-жылы туулган М.С. аттуу жаранды сабап, уюлдук телефонун жана акчасын тартып алган белгисиз адамдар тууралуу маалымат келип түшкөн.

"Бул факты боюнча Кылмыш-жаза кодексинин 207-беренеси (каракчылык) менен кылмыш иши козголгон. Ыкчам-иликтөө иш-чараларынын алкагында, кылмышка шектелип Талас шаарынын 1978-жылы туулган А. Т. жана 1979-жылы туулган У.Т. аттуу тургундары кармалып, убактылуу кармоочу жайга киргизилди", - деп айтылат маалыматта.

Тергөө учурунда шектүүлөр кылмыш жасаган учурда мас абалында болгондугу аныкталганы айтылат. Учурда тергөө иштери уланып жатканы кошумчаланды.

Автор: Жаңыл Ниязбекова