Бишкек шаардык соту Адахан Мадумаровду камакта калтырды

Бүгүн, 13-сентябрда Бишкек шаардык сотунда Жогорку Кеңештеги "Бүтүн Кыргызстан" фракциясынын лидери Адахан Мадумаровдун бөгөт чарасы жана анын кармоонун мыйзамдуулугу каралды. Бул тууралуу шаардык соттун басма сөз кызматынан билдирди.

Маалыматка ылайык, Бишкек шаардык соту саясатчыны Биринчи Май райондук сотунун 24-октябрга чейин камакта калтыруу чечимин өзгөртүүсүз калтырды.

Жараян жүрүп жатканда соттун имаратынын алдына Мадумаровдун тарапташтары чогулуп, аны бошотууну талап кылып турушту. Имаратка эч ким киргизилген жок жана муну мекеменин басма сөз кызматы кылмыш ишине “жашыруун” деген гриф берилгенине байланыштуу деп түшүндүрдү.

Мадумаров 2-сентябрда кармалган. ИИМ ага Кылмыш-жаза кодексинин 323-беренеси ("Мамлекеттик чыккынчылык") менен айып коюлганын билдирген. Биринчи Май райондук соту анын бөгөт чарасын ошол эле күнү карап, 24-октябрга чейин УКМКнын тергөө абагына камалган.

Эскерте кетсек, Башкы прокуратура Адахан Мадумаровду 2009-жылы кыргыз-тажик чек арасы боюнча протоколго кол койгону үчүн жоопко тартууга уруксат сураган. Депутаттык комиссия эл өкүлүнө коюлган төрт берененин бири, Кылмыш-жаза кодексинин 338-беренеси (Бийликтен аша чабуу) менен жоопкерчиликке тартууга макулдук берген.

Мадумаров Коопсуздук кеңешинин катчысы болуп 2008-2009-жылы бир жыл иштеген. Ошол маалда Ош - Баткен - Исфана жолун оңдоо жана көпүрө куруу үчүн 275 метр узундуктагы беш гектар жерди тажик тараптан 49 жылдык мөөнөткө ижарага алуу боюнча протоколго кол койгон. Депутат бул документ юридикалык күчкө ээ эмес экенин айтып келет.

Автор: Бек Оморбеков
Фото: Бек Оморбеков