Күрөш: Белграддагы Дүйнө чемпиондугунда дагы бир жагымсыз окуя болду

Бүгүн, 18-сентябрда Сербиянын борбору Белград шаарында өтүп жаткан күрөш боюнча Дүйнө чемпиондугунун үчүнчү күндүк беттештери өтүүдө.

Анда 65 килограмм салмакта чейрек финалда азербайжандык Гаджи Алиев менен армениялык Вазген Теванян кез келди.

Армениялык балбан бул беттеште бир топ активдүү болуп, эсеп саны беттеш бүтөрүнө 25 секунд калганда 11:2 болчу. Акыркы секундарда эки балбан килем үстүндө күрөшпөй эле жаңжалдаша кетишти. Аларды машыктыруучулары жана калыстар ажыратып калышты.

Жыйынтыгында калыстар азербайжандык балбанга сары айып кагазын көрсөтүп, армениялык балбанга 1 упай беришти.

Вазген Теванян Дүйнө чемпиондугунун жарым финалына чыкты.

Армения менен Азербайжан Тоолуу Карабахка байланыштуу ушул кезге чейин жаңжалдашып келгени баарыбызга маалым.

Автор: Азат Бейшенбеков