Бишкекте үйлөргө кирип барып, бычак такап тоноп жүргөн 17 жаштагы өспүрүмдөр кармалды (видео)

Бишкекте үйлөрдү карактаганга шектелгендер кармалды. Бул тууралуу бүгүн, 1-апрелде шаардык милиция кабарлады.

Маалыматка ылайык, 22-мартта милицияга А.О. аттуу жаран кайрылган. Ал күн мурун үйүнө белгисиз адамдар бычак менен кирип келип, кичинекей уулун бычактайбыз деп коркутуп 5 миң сомун, мобилдик банкинг эсебиндеги акчаларын жана 55 миң сомдук iPhone 13 телефонун тартып алып кетишкенин айткан.

Ошондой эле 22-мартта Ленин РИИБине К.Т. аттуу жаран дагы арыз менен кайрылган. Арыз ээси 21-мартта Левоневский көчөсүндө жайгашкан үйүнө кирип келген жарандар бычак менен коркутканын, 22 миң сомдук Redmi Note 13 жана 15 миң сомдук Samsung 12 A үлгүсүндөгү телефондорун тартып алышканын билдирген.

Бул факты боюнча Кылмыш-жаза кодексинин 207-беренесине (Каракчылык) ылайык кылмыш иши козголгон.

Шектүүлөрдүн уюштуруучусу 2007-жылы туулган А.С. Жалал-Абад облусунун аймагынан кармалган. Такталгандай ал бул иште уюштуруучу жана байкоочу болгон. Андан мурда кылмыш жолу менен алынган Redmi Note 13 үлгүсүндөгү телефон табылган.

Ал эми 2006-жылы туулган У.С. жана 2007-жылы туулган Ш.Б. аттуу шектүүлөр Бишкектен кармалып, бардыгы убактылуу кармоочу жайга киргизилишкен.

Учурда алардын ушул сыяктуу кылмыштарды жасоого тиешеси бар экендиги такталууда.