Ош облусунун сел каптаган аймактарына электр жарыгы толук кандуу берилди. Бул тууралуу бүгүн, 16-июлда Энергетика министрлигинен билдиришти.
Ага ылайык, 14-июлда Ош облусунун аймагында жүргөн катуу селдин кесепетинен Ош электр тармактары ишканасынын Кара-Суу РЭТи тейлеген 7500 керектөөчү жарыксыз калып, 8 даана электр тирөөчтү сел агызып кеткен.
Кара-Суу районунда жайгашкан 110/10 кВ Беш-Мойнок көмөк чордонунун сел каптагандыктан, калыбына келтирүү иштери жасалып, чыңалуу толук кандуу 7500 абонентке берилди. 4 трансформатор жеке менчик болгондуктан калган 25 керектөөчүгө электр энергиясын берүү аракеттери көрүлүп жатканы кабарланат.
"Жалпы 26 персоналдан турган авариялык оңдоп-түзөө бригадалары иштеп, 6 даана атайын техника: 4 даана бригадалык автоунаа, 1 даана экскаватор жана 1 даана камаз жумушка тартылган.
Мындан тышкары аталган ишкананын Сулайман-Тоо РЭТи тейлеген Ош шаарындагы “Центр” көмөк чордонунун ЭлТР фидеринен 1 даана, “Катта-Сай” көмөк чордонунун Дача фидеринен 1 даана 10 кВ электр мамычалары сынып, агып кеткен", - деп айтылат анда.
Азыркы учурда электр тирөөчтөрү калыбына келтирилип, жаңы тирөөчтөр коюлду. Ошондой эле Төлөйкөн көмөк чордонунун Түндүк фидерине чагылган түшүп, трансформаторду алмаштыруу иштери жасалып жатканы маалымдалды.