Дүйнөлүк көчмөндөр оюндарына Кыргызстандан канча спортчу барары белгилүү болду

Казакстандын Астана шаарында өтө турган көчмөндөр оюнуна Кыргызстандан 268 спортчу барат. Бул тууралуу бүгүн, 5-августта Спорт департаментинин директорунун орун басары Самат Токтоналиев маалымат жыйында билдирди.

Анын айтымында, алардын баары спорттун 29 түрүнө катышат. Бара турган спортчулардын кийимине, тамак-ашына, жол кире жана жаткан жерине мамлекет тарабынан акча бөлүнүп берилет.

Ошондой эле Токтоналиев спортчулар үчүн форманын эскизи иштелип чыкканын, толук маалымат кийин берилерин айтты.

Белгилей кетсек, быйыл V Дүйнөлүк көчмөндөр оюндары 8-13-сентябрда Казакстандын Астана шаарында өтөт.