Кыргыз балбан кыздары дүйнөлүк рейтингде кандай орундарга ээ болду?

Париж шаарында өткөн Олимпиададан кийин Дүйнөлүк күрөш уюму (UWW) жаңыланган рейтингин жарыялады.

Анда Париж Олимпиадасында кыз-келиндер күрөшүнөн коло байге алган Айсулуу Тыныбекова 62 килограмм салмак ченинде 57 миң 200 упай менен 3-орунга жайгашты. Буга чейин Тыныбекова 1-сапта болчу.

Ал эми күмүш медалдын ээси Мээрим Жуманазарова 68 килограмм салмакта 41 миң 400 упай топтоп 16-тизмеден 4-сапка көтөрүлдү.

Олимп оюндарында 5-орунду ээлеген 76 килограммдагы Айпери Медет кызы 46 миң упай менен 4-орунга түшүп калды. Ал мурунку рейтингде 1-болчу.

Белгилей кетсек, XXXIII Жайкы Олимпиада оюндарында Тыныбекова коло үчүн монголиялык балбан менен күрөшүп, 6:2 эсебинде жеңип алган. Жуманазова финалда америкалык Эмит Элор аттуу балбан кызга 0:3 эсебинде утулуп калып, күмүш медаль тагынган. Ал эми Айпери коло үчүн беттеште кубалык балбан кызга жеңилип калып, 5-орунду камсыздаган.

Автор: Кылымбек Бейшеев
Фото: Интернеттен алынды