Париждеги Олимпиададан кийин дагы бир атактуу балбан карьерасын жыйынтыктады

Азербайжандык белгилүү балбан Гаджи Алиев Париж Олимпиадасынан кийин карьерасын жыйынтыктаганын өзүнүн социалдык тармактагы баракчасына жазды.

Ал мындай чечимди Париж Олимпиадасынын чейрек финалындагы жеңилүүсүнөн кийин кабыл алганын баса белгиледи.

"Урматтуу элим, көп жылдар бою мен көптөгөн жеңиштерди алып келдим, ар бир жолу желегибизди бийикке көтөрүп, гимнибизди ырдоо мен үчүн чоң сыймык болду. Азербайжан элине ушул күнгө чейин мени колдоп келгени үчүң ыраазычылык билдиргим келет", - деп жазган ал.

Эске сала кетсек, 33 жаштагы балбан үч жолу дүйнөнүн, төрт жолу Европанын чемпиону болгон. Ошондой эле Олимпиада оюндарында 1 күмүш, 1 коло байге уткан.

Париж Олимпиадасында ал чейрек финалга чыгып, анда венгриялык Исмаил Мусукаевге 10:3 эсебинде утулуп калган.

Автор: Азат Бейшенбеков