БШК Нуржигит Кадырбековду депутаттык мандатынан ажыратты

Борбордук шайлоо комиссиясы бүгүн, 30-августтагы жыйынында Жогорку Кеңештин депутаты Нуржигит Кадырбековдун ыйгарым укуктарын мөөнөтүнөн мурда токтотту.

Парламенттеги “Ыйман нуру" фракциясынын лидеринин депутаттык мандатын тапшыруу боюнча арызын Боршайкомдун мүчөлөрү бир добуштан колдоду.

Эл өкүлү бүгүн өз каалоосу менен мандатын тапшыруу үчүн арыз жазган. Анын эмне себептен мындай кадамга барганы белгисиз. Өзү менен байланышууга мүмкүн болгон жок.

Белгилей кетсек, Нуржигит Кадырбеков 22-августта УКМКга сурак берип чыккан. Эл өкүлү SUPER.KG порталына суракка "Ыйман” фондунун ишмердигине байланыштуу күбө катары чакырылганын айтып, тергөөнүн купуялуулугуна байланыштуу кененирээк айта албастыгын билдирген.

Ошондой эле ал сурак учурунда анын депутаттык мандаты тууралуу кеп болбогонун айткан болчу.

Автор: Бек Оморбеков
Фото: Бек Оморбеков