Азия биринчилигинде кыргыз дзюдочулары 10 медаль жеңип алышты

Өлкөнүн дзюдо боюнча өспүрүмдөр жана жаштар курама командасы Азия чемпиондугунда 10 медаль жеңишти. Бул тууралуу Дене тарбия жана спорт департаменти билдирди.

Маалыматка ылайык, Түштүк Кореянын Мунгён шаарында өткөн биринчиликте кыргыз спортчулары 2 алтын, 8 коло байге уткан. Жаштар арасында (U-20) 81 килограмм салмакта катышкан Эржан Канатбеков жана +100 килограмм салмакта Эмирхан Жолдошбеков алтын медалга ээ болушкан. Ошондой эле 70 килограммда Алина Молдокулова, 57де Жанара Жолдошева жана 63 килограмм салмакта Мырзайым Дуйшенбекова менен Адина Көчкөнбекова 3-орунду багындырышкан.

Ал эми өспүрүмдөр арасында (U-17) 50 килограмм салмакта Марсель Түмөнбаев, 60 килограммда Адис Орозмаматов, 57де Айдай Какитаева жана 70 килограмм салмакта Азима Конокбаева коло медаль тагынышкан.