"Барселонанын" легендасы көзүнө жаш алып, карьерасын жыйынтыктады

Уругвайдын улуттук курама командасынын жана америкалык "Интер Майами" клубунун чабуулчусу Луис Суарес улуттук курамадан кетерин жарыялады. Бул тууралуу чет элдик басылмалар жазышууда.

"37 жаштагы футболчу пресс-конференция учурунда 7-сентябрда боло турчу Парагвайга каршы оюндан кийин Уругвай курама командасынан кетүүнү пландап жатканын билдирди. Ал сүйлөп жатканда толкунданып, көзүнө жаш алган", - деп айтылат маалыматта.

Суарес 2007-жылдын 8-февралында Уругвай курамасында дебют жасап, 17 жылын бул командага арнаган. Ал 2011-жылы Аргентинада өткөн Америка Кубогунда команданы жеңишке жеткирген.

2011-жылы 24-июлда турнирдин финалында Луистин командасы Парагвай курамасы менен беттешкен. Жаш Суарес беттеште биринчи голун киргизген. Ошондой эле анын катышуусунда команда 2024-жылы АКШда өткөн Америка Кубогунда коло байгеге ээ болгон.