Жапаров Дүйнөлүк көчмөндөр оюндарынын ачылыш аземине катышты (сүрөт)

Президент Садыр Жапаров 8-сентябрда Казакстандын баш калаасындагы “Астана Арена” стадионунда өткөн V Дүйнөлүк көчмөндөр оюндарынын ачылыш аземине катышты. Бул тууралуу өлкө башчынын администрациясы билдирди.

Ачылыш аземге Өзбекстандын президенти Шавкат Мирзиёев, Түркмөнстандын Халк Маслахатынын төрагасы Гурбангулы Бердымухамедов, Татарстандын башчысы Рустам Минниханов, Саха Республикасынын (Якутия) башчысы Айсен Николаев жана башкалар да катышты.

Иш-чарада Дүйнөлүк көчмөндөр оюндарына катышуучу өлкөлөрдүн парады болду. Андан соң Дүйнөлүк көчмөндөр оюндары, көчмөндөрдүн тарыхы жана дүйнө таанымы тууралуу видеоролик жана театрлаштырылган шоу көрсөтүлдү.

Президент Садыр Жапаров Казакстанга болгон иш сапарын аяктап, 8-сентябрдан 9-сентябрга караган түнү Бишкек шаарына кайтып келди.

Эске салсак, оюндар 8-13-сентябрь аралыгында Астанада өтөт. Иш-чарага дүйнөнүн 80ден ашуун өлкөдөн 3000ден ашуун спортчу катышууда.

Автор: Айжанар Рыспек кызы