Көчмөндөр оюндары: Кыргызстан алгачкы күндү 11 медаль менен жыйынтыктады

Казакстандын Астана шаарында өтүп жаткан V Дүйнөлүк көчмөндөр оюндарынын алгачкы күнүн Кыргызстандын курамасы 11 медаль менен жыйынтыктады.

Көчмөндөр оюндарынын сайтындагы маалыматка ылайык, үч алтын, беш күмүш, үч коло медаль кыргыз курамасынын капчыгында.

Оюндардын алгачкы күнү далба ойнотуу, аттын үстүндө жаа атуу, көк бөрү, көкпар (жер улак), тогуз коргоол, чүкө оюну, таяк тартыш, күрөш, казак күрөшү жана эр эңиш боюнча мелдештер өткөн.

Ошондой эле Кыргызстандын көкпар боюнча курамасы монголиялыктарды жеңип, көк бөрүчүлөрү Өзбекстандын курамасын 12:6 эсебинде артка таштады.

Белгилей кетсек, 8-13-сентябрда Астанада V Дүйнөлүк көчмөндөр оюндары өтүп, ага 89 өлкөдөн 2 миңден ашык спортчу катышууда. Ага Кыргызстандан 183 спортчу барды.

Автор: Замира Ниязбекова