Токмокто миллион сомдук балыкты алдоо жолу менен алып кеткенге шектүү жигит кармалды

Токмок шаарында ири суммадагы алдамчылыкка шектелип 27 жаштагы жаран кармалды. Бул тууралуу бүгүн, 11-сентябрда Чүй ОИИБинен билдирди.

Маалыматка ылайык, 22-августта милицияга М.А. аттуу жаран арыз менен кайрылган. Ал Х. аттуу жаран июнь айында ишеничине кирип, 1 миллион 863 миң 350 сомдук балыктарын сатып алганын, бирок акчасын төлөбөстөн из жашырып кеткенин айткан.

Мындан тышкары, ошол эле күнү анын үстүнөн С.А. аттуу жарандан арыз түшкөн. Арыз ээсинин айтымында, шектүү жай мезгилинде анын 16 миң доллар турган Toyota Prius үлгүсүндөгү унаасын алып, из жашырып кеткен.

Аталган фактылар боюнча Кылмыш-жаза кодексинин 209-беренесинин (Алдамчылык) негизинде кылмыш иши козголгон.

Шектүү катары мурда бир нече жолу соттолгон, пробация көзөмөлүндө турган 1997-жылы туулаган Н.Х. аттуу жаран кармалып, убактылуу кармоочу жайга киргизилген. Анын ушул сыятуу бир нече алдамчылык иштерди жасаганы аныкталган.

Учурда тергөө иштери уланууда.

Автор: Кылымбек Бейшеев
Фото: Чүй ОИИБ