Көчмөндөр оюндары: Жер улак боюнча финалчылар аныкталды

Бүгүн, 11-сентябрда Казакстандын жер улак боюнча курама командасы Астана шаарында өтүп жаткан V Дүйнөлүк көчмөндөр оюндарынын финалына жолдомо алды.

"А" тайпасындагы жарым финалдык беттеште казак улакчылары орусиялык атаандаштарын 18:2 эсебинде жеңип алды. Эми 12-сентябрь күнү коңшу өлкөнүн спортчулары алтын байге үчүн кыргыз улакчылары менен беттешет.

Эске салсак, кечээ "Б" тайпасында Кыргызстан Түркияны 15:1 айырмачылыгы менен утуп, финалга чыккан болчу. Жалпы жер улактан 9 мамлекеттен келген командалар Көчмөндөр оюндарына катышууда.

Автор: Кылымбек Бейшеев
Фото: Интернеттен алынды