"Аз чыгым болмок". Депутат Марипов шайлоолорду күн жылуу мезгилде өткөрүүнү сунуштады

Жогорку Кеңештин депутаты Бакытбек Марипов шайлоолорду күн жылуу мезгилде өткөрүүнү сунуштады. Бул тууралуу эл өкүлү бүгүн, 11-сентябрдагы парламент жыйынында айтты.

Анда жергиликтүү кеңештерде депутаттык мандаттардын санын көбөйтүүгө багытталган мыйзам долбоору каралып жаткан. Марипов мыйзам долбоорунун демилгечилеринин бири Марлен Маматалиевден 17-ноябрга белгиленген шайлоону күн жылуу убакка жылдырса болобу деп сурады. Маматалиев жылдырууга болбой калганын, себеби жарлыкка президент кол койгонун айтты.

"Мындан кийинки шайлоолорго деле сунуштап кетейин. Шайлоону күн жылуу мезгилде өткөрсөк чыгымдар да азыраак кетмек. Күн суук кезде үгүт иштерин жүргүзүүдө дагы бир топ кыйынчылыктар жаралып жатат", - деди Марипов.

Талкуунун жыйынтыгында мыйзам долбоору биринчи окууда кабыл алынды.

Эскерте кетсек, жергиликтүү кеңештердин депутаттарын шайлоо 17-ноябрга белгиленген.